今年 10 月，香港警方成功偵破一宗涉及深偽技術（Deepfake）的大型詐騙集團，拘捕 27 人，揭發該集團以人工智能技術假扮身份行騙，涉及騙款高達 3.6 億港元。詐騙手法不僅包括使用 Deepfake 技術生成虛假影像和聲音，還會結合精心設計的「社交工程」，從情感層面攻破受害者的防線。
無論是冒充網上情緣、假扮加密貨幣投資專家，還是製造悲情故事博取同情，集團成員透過詳細分工和專業訓練，成功吸引大量本地及海外受害人「落搭」。面對這些新型騙局，電腦保安研究員 VX Research 行政總裁賴灼東將為我們分享實用的防範貼士，教大家如何在真假難分的數碼世界中保護自己。
尹思哲：記得上次提過啲 AI 騙案，好似針對公司高層嗰啲，最後原來係假 CFO，畀人攞咗唔少錢。最近又見到，香港又爆出類似案件，警方拉咗廿幾人，今次係針對個人，呃咗 3.6 億咁多！作為資訊保安專家，你有冇留意到呢類 AI 假騙案愈嚟愈多？有咩地方要特別警惕？
賴灼東：呢類真係多咗，因為而家啲科技進步得好快，硬件越嚟越勁，做影像、聲音合成嘅 AI 技術門檻都低咗。正常嚟講啲人可能攞嚟寫程序、生成文字，但騙徒可以攞嚟整假聲、假人出嚟，效果真到連專業人士都難分真假。佢哋會攞受害人嘅相、聲音、甚至社交媒體上嘅資料嚟訓練 AI，令 AI 可以扮得似樣到你認唔出，就咁靠呢啲手段已經可以好輕易呃到人。
尹思哲：咁即係可以用 AI 合成一個人出嚟，回應都好似真人咁？我睇返呢啲騙案，成個係集團式操作，佢哋唔單止用 AI，仲會專門訓練員工，甚至有業績榜，成套心法教你點呃人、點令受害者同情，欺騙受害者嘅情感。即係話，有啲 case 係用 AI 同真人夾埋一齊用？
賴灼東：真人操作會更加有說服力，因為真人會用到一啲地道啲嘅語氣、表達方式，呢啲 AI 未必做到。呢種手法叫「社交工程」，騙徒可以扮做一個熟人，例如假冒你 IT 支援部嘅人話要 reset password，或者扮你個「情人」話喺機場過唔到關，差幾百蚊美金求你幫手。呢啲情節係經過鋪排，令你慢慢對呢個假身份產生感情同信任，等到時候一開口求助，你根本已經冇咩防備心。
實用方法識破騙徒
尹思哲：咁普通人有冇啲方法可以測試對方係咪假嘅？如果懷疑同一個假人傾緊計，有咩簡單直接嘅方法可以識破？
賴灼東：如果係視像嘅話，你可以叫佢做啲即時反應，譬如擺個水樽喺鏡頭前睇下會唔會有 rendering 破綻，因為 DeepFake 做唔到即時透明物件。或者假裝話佢眼鏡有嘢、牙縫有條菜，叫佢即刻處理，睇佢有冇即時反應。另外，可以即刻另外打固網電話俾佢，睇佢接唔接到，呢啲都係測試方法。
尹思哲：咁語音呢？有冇得測試？有時可能係就咁傾電話，唔係視像？
賴灼東：語音方面，可以留意佢語氣同反應速度。試下突然轉語言，例如由廣東話轉英文，睇佢反應會唔會有 delay，因為 AI 通常即時處理語言有難度。又或者假如你明知對方根本唔識一種語言，但佢竟然識得即時回覆你，呢啲都係破綻。
尹思哲：有道理。其實而家啲社交媒體，好多陌生人加 friend request，甚至啲帳戶睇落好似真人咁。係咪應該避免接受呢啲邀請？
賴灼東：係呀，建議唔好亂加陌生人，尤其係啲新帳戶或者無歷史記錄嘅。好多騙徒會用假帳戶攞你信任，甚至會做一個完整假朋友圈。最好定期清理朋友清單，特別係啲唔識、冇互動嘅人。如果發現有古怪嘅陌生帳戶，就要考慮踢走，避免俾假帳戶監察你嘅資訊。但即使係熟人帳號都唔代表背後真係佢本人。
尹思哲：咁多假帳戶，要防真係唔容易。咁我哋應該唔好再網上交友？
賴灼東：唔使咁極端，但係要保持戒心。網上識人冇問題，不過未見面嘅話唔好輕易做交易。其實心法係網上認識嘅人，大家應該一律當佢係假嘅先，一直要到見面確認過係真人，先可以考慮進一步信任對方。
「深偽紅隊」需求增
賴灼東：最近我哋仲有啲請求要我哋做「Deepfake Red Team」（編按：「Red Team」 通常在資訊保安中指「紅隊」，是模擬攻擊者行為，用來測試和挑戰系統或組織安全性的一種手法），簡單嚟講即係用 Deepfake 技術扮人，睇下可唔可以滲透入公司內部測試佢哋嘅警覺性。譬如我哋可以假扮成你老闆，係 LinkedIn 加你，鋪排幾個月等你對我放下戒心，然後開始互動。
尹思哲：聽落真係似間諜劇！呢啲測試對保安教育係咪特別有效？因為平時就噉講資訊保安可能比較悶，但當真係遇到實際嘅情境，效果完全唔同？
賴灼東：完全同意，所以呢啲「Red Team」測試嘅震撼教育好強，以前可能只係簡單發個 Email，而家仲會鋪排兩三個月，先慢慢建立信任，睇佢哋有冇防備。其實企業內部人員切身面對過呢啲處境，先會對保安有更加真實嘅體會。
尹思哲：見到而家多咗呢類查詢，金融業、政府部門呢啲機構會特別有興趣？
賴灼東：係，金融機構尤其多，因為呢啲機構涉及大量敏感資料，保安漏洞可以造成重大損失。而政府部門，有時開會牽涉機密資料，都需要測試佢哋嘅安全防範係咪到位。
尹思哲：的確，今時今日真係唔可以假設所有參與會議嘅人都係真嘅。其實 Zoom 嘅錄音、錄影俾人攞去訓練數據，甚至用嚟扮人都好危險。
賴灼東：係呀，所以有時測試可以試下突擊轉語言，睇對方反應，如果佢即時跟得上，咁可能係高級 AI 操作。其實要對付呢啲科技，人嘅創意都係一種武器！
尹思哲：今日多謝你分享咁多有用資訊！學到好多嘢！
