呢日，有條打劫片瘋傳，手持𠝹刀男子兇個阿叔，要佢拎晒收銀機啲錢出嚟。誰不知，阿叔一個閃身，邊話「X 你個老母，打劫？」邊返去立起菜刀，「倒追」個賊佬轉頭。
事件以賊人「打劫唔成，一百蚊俾咗，米粉無拎，錢又無找，仲落荒而逃，最後卒之被捕」正式告終。成條片，阿叔最鏗鏘一句：「問題係，你連打劫都無誠意，咁我咪㷫囉！」
呢句說話，對我而言，相信會繞樑三日無限 loop。忽然間，叮一聲，諗起早兩日另一單「花生」，有個零售管理協會主席，公開話「希望遲啲發放消費券、否則對部分零售業幫助不大。」
堂堂一個商會主席、公司 CEO，公開講嘢竟然咁無公關，仲唔係同手持一把𠝹刀仔，手震兼口窒地打劫嘅賊人一樣⋯⋯ 咁無「誠意」？
其實今時今日，對香港人嚟講，打劫已經好小事。大家仲記唔記得，誠哥曾經俾人捉咗個仔，連佢都話：「我自己做錯，我哋係香港知名度咁高，但一點防備都無，我要仔細檢討。」
誠哥意思係，贖金，我預咗俾，但拜託，你都專業少少，唔好俾人拉，平安送返個仔俾我，唔該。相比之下，同樣係打劫，賊王張子強嗰隻，絕對有誠意得多。
返嚟今日，你話疫情下，自由行無晒，市民唔出街，零售業處於「寒冬」，但我亦可以話，而家係網購盛夏，點解唔一早轉型？
已經唔好講 HKTVmall，旅遊業同樣重挫，人地 Klook 轉搞 Staycation 同本地遊；GOGOX 同智能櫃 alfred24 合作，以填補服務縫隙；Snapask 免費開放平台，為在家學習學生提供支援；Finddoc 同養和合作，提供視像會診服務等。
點解人地可以「化危為機」而你只識「攤大手板」？
同利世民、高明做節目W3NOMICS，講到近年好興嘅所謂「虛無主義」：個意思即係，唔理三七廿一，存在即係合理，而合理，就唔好再質疑。情況就好似，兩個人打交、甚至係兩個國家打仗，其中一方「無理取鬧」開拖，虛無主義者就會話「係咁㗎啦」，存在即合理嘛。
如果套用「虛無主義」思想，經濟差就自然有人打劫，係咁㗎啦，怪得邊個啫？同樣道理，想打劫人嗰個，能力唔夠動作慢，自然俾人斬返轉頭，係咁㗎啦，試問又怪得邊個？
