close

同兄弟開 live 吹水,講元宇宙 Metaverse,飲大兩杯,想返當年,唔少社交遊戲初創(例如本地老牌公司 6waves),都曾靠 Fb 平台上位:咩嘢「古惑仔 online」、「開心農場」,叫做那些年網絡文化嘅集體回憶。

恐怖嘅係,Fb 後來感到「有威脅」,大幅削減社交遊戲觸及率,直接隊瓜社交遊戲嘅生財之道,作為玩家唔易察覺,但對於淪為「低端內容」嘅社交遊戲公司,忽然由天堂跌落地獄,遭遇可謂悽慘之極。

哈!但世事之過癮,莫過於「風水輪流轉」:結合咗社交遊戲同加密貨幣嘅元宇宙(Metaverse),隨住幣圈壯大堀起,結果不可一世嘅 Fb,反過嚟需要「改名」,仿效返社交遊戲轉頭,長遠轉型元宇宙揾食,不可謂不諷刺之極!

Fb 想點,假如有睇晒 Mark Zuckerberg 嘅講話,照計應該會知道,但最搞鬼在於,堂堂 Fb 創辦人、全球最具影響力嘅企業家,佢嘅直播觀眾人數得個幾萬人,隨時少過之前鍾培生同林作場拳賽,都咪話唔悲哀。

好喇,若問 Fb 嘅元宇宙大計,究竟係咩葫蘆賣咩藥?其實,亦唔係咩新鮮概念,包括 Zuckerberg 吹奏多年,但一直未有實質嘢嘅 VR 在家工作、VR 遙距運動再加上 VR 元宇宙遊戲之類。Fb 改名除咗顯示嗰老細嘅決心,嚟緊幾年,未必會起到咩實質作用。好有可能,隨時唔夠花幾百億美金收購啲初創,例如當年買 Whatsapp 同 Instagram 嚟得實在。

老老實實,Fb 改名,極其量係反映 Zuckerberg 嘅離地同無橋,對於普羅用家嚟講,意義唔係咁大。但老友利世民話,其實每逢 Fb、YT 呢啲大台,要搞新嘢嘅時候,作為用家唔理 3721,一於死跟開咗帳戶插旗,做最早嗰批開 Fb page、同 YT Channel 嘅人,並持續經營落去,過得幾年睇返,通常都係有你著數嘅。

計我話,Fb 出咩新嘢試下無妨,但與此同時,亦不妨留意真正嘅元宇宙走勢,例如土炮 Animoca Brands 嘅遊戲 The Sandbox,專屬嘅加密幣SAND,對上一個月(寫稿呢刻)升咗83%,若同一年前比較,就更加升咗2800%。即係話,若你一年前開始玩game,你嘅資產今天已升值28倍。我諗,呢個至係 Fb 改名最貼地最真實嘅啟示囉。

尹思哲

Tags :fb元宇宙
尹思哲

The author尹思哲