騰訊又出事，由股王淪為「精神鴉片」呢段路，中間究竟發生咗咩事？其實連同之前嘅恒大、螞蟻上市，後來滴滴上市以至近期整治補習行業，內地官方打擊「潛在風險」絕不手軟。
有「鱷王」之稱，對沖基金 Bridgewater 達里奧警告，投資者唔好期望中國式資本主義，同西方嘅操作方式一模一樣。
唯一類似嘅地方，中西兩套資本主義之下，影響力愈大、實力愈強嘅企業，愈容易成為監管目標，Google、Facebook 近年在歐美市場一樣受到不少「招呼」。
但當然，西方政策的「可預測性」遠比中國來得要高，而且企業有不少管道進行遊說，而說客 lobbying 本是成熟到極的行業，不同於中國式監管忽如其來、難以預料。
騰訊是不是好的公司，答案自然是肯定的。於 2020 年，遊戲是 2000 億元人民幣的產業，其中近半產值輸出海外，而騰訊是龍頭。整治之後，有分析員呼籲「愈跌愈買」，因為相信騰訊長遠有能力適應監管，作出「修正」之後，依然可以年年賺大錢。
我甚少買股票，唔識得睇呢次「低吸良機」，反而另一單消息更吸引我：總部設於香港遊戲公司 SpinX，以 20 億美元高價售予韓國 Netmarble。
要知道，SpinX 旗下賭博遊戲《Cash Frenzy》，於全球排名第三，上半年收入已經 2.9 億美元，背後操盤者也是中國團隊，跟騰訊一樣同屬「成功出海」手遊公司。
騰訊未來或能「重拾升軌」，但於某程意義上，尤其對創辦人和管理團隊而言，像 SpinX 這樣成功賣盤，真實完成「Cash Frenzy」，未來可以二度創業或轉換跑道，何嘗不是一個完美結局？
以前嘅創業者，性格大多「桀傲不馴」或「敢想敢做」，時刻諗住怎去顛覆舊有遊戲規則。處身今天嘅中國市場、中式資本主義之下，創業者資本家要明白自己「位份」，要學懂真誠下跪，「錯就要認，打要企定」，咁樣至能長遠續航。當時移世易，創業讀《喬布斯傳》、《馬斯克傳》遠不如黃仁宇《萬曆十五年》。
