我從來唔信「有志者事竟成」，因為主觀願望，並唔可能改變客觀現實。
好多 Startup 在記者面前，鍾意講「願景」，我亦唔覺有幾重要。但唔好誤會，我意思並非做人唔應該有志向。舉個例，我記得 Lalamove 創辦人曾經話我知，佢地願景係「改變移動資源的運作」。
Lalamove 由零到獨角獸，一路以來唔係每個香港人都識欣賞，但犯過所有低級錯誤、經歷過彈盡糧絕邊緣，捱到有今天嘅成績，有全球嘅影響力，靠嘅唔係 「有個好願景」，而係身處高山定低谷，依然一直日復日年復年堅持付出同行動。
去唔去到目的地，要靠堅持同執行力；至於願景係方向，若果搞錯咗，就幾努力都係假。
最近睇咗 PwC 份《Hopes and Fears 2021 China Report》，先至發現，對於未來世界嘅工作環境，原來最樂觀係中國人同印度人，相反日本、英國同埋香港人，就相對悲觀得多。其中又發現，竟然只得 19% 調查港人，有信心好好運用科技於職場馳騁。
簡單嚟講，份報告指出中國人嘅志向係「自主度」，對於工作或者事業，佢哋想要更大嘅控制權，例如做咩嘢同幾時做，自己可以掌握決定。相對而言，香港人就偏向追求「穩定度」，想喺同一機構當中，長期服務兼保住份工。
報告又認為，出於「志向」唔同，中國打工仔於是更能擁抱 remote work；其實我覺得，這也很好解釋，內地創業或自僱人士的比例，點解比起香港更高。
以上發現，我覺得最好玩在於，普遍港人願意放棄部分工作嘅自由（例如工作性質），去換取安穩嘅生活，相反中國人就願意放棄部分生活嘅自由（例如甘被監控），去換取更好嘅工作。
作為創辦人好，打工仔又好，個人嘅志向同選擇，只需要向自己交待，唔需要隨波逐流，如果明明係想自主，最後跟大隊求穩定，結果自己都呃埋，可以話十分之愚蠢！
尹思哲
