最近每被問及，元宇宙點睇，是否虛火、炒作？我總是回答：Fb（Meta）轉型掂唔掂，難講，但元宇宙本身，我相信是未來。
讀完知名科技博客 Ben Thompson 分析，更加深我信念。Ben Thompson 分析嘅核心，在於「元宇宙非新事物，仲其實一直存在，因為佢叫互聯網。」換言之，元宇宙可以話係「互聯網產業一場深刻的變革」。
經過兩年疫情停擺，形成遙距虛擬辦公、不可回頭的觀念轉變；同時加密幣的普及、NFT 乘時而起確立數碼產權，都是推動互聯網「元宇宙化」的重要契機。
同為互聯網的變革，當年 Web 2.0 顛覆「互聯網僅單向接收」的現狀，後來 Social 挪開「人際交往必須是實體」的阻礙，去到 Mobile 則打破「互聯網場景限於戶內」的局限。
至於元宇宙，有人稱之為 Web 3.0 就更進一步破除「虛和實的分界」：當實體藝術收藏未免有贗品，NFT 作品卻難以複製作假；當實體法幣因量化寬鬆不斷貶值，虛擬貨幣卻因供應設限而恆久保值。
我知元宇宙係未來，但我更想知道，對於香港及港人，互聯網「元宇宙化」的意義同機會？尤其對於無時間上網玩 game、又不會遙距返工嘅人嚟講，會唔會過份地遙遠？
適逢同創辦人老友 Dante 及其拍檔 Lucas 網聚，兩人均連環創業，新搞作 Gusto Labs 又以 AR 技術見稱，屬元宇宙概念「風口」，我當然打蛇隨棍，問香港市場機遇。佢地贈咗我幾個關鍵字：BrandTech、AR Commerce、vKOL，其餘商機同細節，或要靠我自己參透。
以我所知，Gusto Labs 最近為 CSL 同男團 Mirror 推出「AR 閃中閃」，亦即既可實體收藏、又有 AR 體驗嘅紀念卡。鑑於元宇宙獨角獸 Animoca Brands 亦揚言，要跟伙伴大搞 K-pop 元宇宙，再加上舊年已有 C AllStar，曾於 Minecraft 辦過虛擬演唱會，我大膽猜測，不排除 Mirror 或同系藝人，很快會舉辦元宇宙演唱會、以 artist 為中心的元宇宙世界，以及更多 NFT 內容體驗。
但基於 AR/VR 的成熟度及可能性，未來又豈止發佈及收藏？元宇宙的價值，在於前所未有的「用戶經驗」，以演唱會為例，不應只得少數粉絲有握手、擁抱或獻花的機會，而是人人都有跟姜濤拖手合唱、上台跟教主大玩安全之吻遊戲之類的個人化體驗。
元宇宙相關技術，運用得好既能「化虛為實」，甚至「以虛勝實」，技術本身只是工具，但記住這個心法、及早準備好，其實各行各業都有條件把握元宇宙的機會。
