close
Faraday Future FF91

上星期,賈躍亭的電動車初創 Faraday Future,以 SPAC 方式(特殊目的收購公司)在美國 Nasdaq 掛牌,擺脫咗財困死局。

Faraday Future 首款車型 FF91, 定位係高階電動跑車,0 至 60 公里加速只需 2.4 秒,試過車嘅人都認性能不俗,就係未知幾時可以量產。卒之,解決咗財務問題,早前宣佈 FF91 出年可面世,又承諾日後再推入門級車型(聽住先)。

睇返件事,最有意思莫過於幾年前,由於樂視網的虧損,不僅公司要從深交所「退市」,賈躍亭亦要「走佬」到美國避債,目前國內身份依舊係「失信被執行人」:火車飛機唔可以坐頭等、唔去得夜總會酒店消費、連仔女都唔可以讀高收費私校。

樂視當年的市值,最高曾經 1700 億元(人民幣,下同),被終止上市時僅餘 67 億。包括融創中國孫宏斌的 150 億資本在內,雖然樂視大小股東血本無歸,但賈躍亭依舊是賈躍亭。

佢抵達美國,係加州成功申請破產(講起嚟感覺古怪)前後,一時發佈新車、一時納指上市,Faraday Future 望落有板有眼,但其實強敵環伺。FF 91 的高端市場,根本是到傳統車廠的「票倉」,就連 Tesla 都沒有優勢。信誓旦旦「必需回國」的他,看來還要留在美國好一陣子。

講返電車,賈躍亭眼光冇錯,全球大國,包括美國、中國以至歐洲,通通都有晒目標,要係若干年後,達到全面普及電車,同時禁售傳統油車。成個汽車行業咁大,外國家庭閒閒地 2 部車起計,個天唔會只眷顧 Tesla 一間公司。

就好似人造肉行業,除咗豬牛魚肉等唔同口味,另外再分植物肉、培殖肉、蟲蛋白幾款唔同生產方式,電車除咗 Model S 嗰種日常代步車型,至少仲有 FF91 呢類高階車型,以至 Rimac 嗰種電動超跑、 Rivian 幫 Amazon 製造嗰款電貨車,同埋 Arrival 嗰隻電動巴士咁多類別。

近幾年,食住汽車業嘅範式轉移,電車相關融資異常活躍,因為就算做唔到下一個 Tesla,亦有唔少潛在傳統車廠買家,賈躍亭係早著先機者之一。

我識嘅另一位創辦人,磨劍十年搞電動跑車,賣點係速度同性能,比 Formula E 有過之而無不及。話說佢近排察覺到轉勢訊號,心念一動,就決定係亞洲自組賽事,要同 Formula E 打對台,而且據講係有突破嘅賽事格式同技術,絕唔會係新瓶舊酒。

呢種「推一架全新電動跑車,要先改造個賽車運動」嘅格局觀同埋激情,只有係 Startup 創辦人身上至揾得到,亦都係佢地身價咁高嘅原因之一。投資佢地身上,固然係高風險,亦會係高回報!

Tags :電動車
尹思哲

The author尹思哲