嚟到英國地大物博，好在仲有朋友，有事可揾人傾，其中唔少係創辦人同公司老闆。
近幾個月，俾傳統英資銀行大整蠱，每次匯款到加密幣交易所，戶口都要被凍結，想解鎖就得打上 CS，重覆又重覆聽對方一大輪「訓話」，每次歷時 20 至 30 分鐘。
然後又輪到「政府認可」嘅加密幣交易所，冇預兆地凍結了戶口，前後 3 個月咁耐，平白錯過唔少投資或出貨機會。好在朋友出謀劃策，有關問題早已解決。
不管是傳統金融機構，抑或親政府交易所，左一句「為你好」，右一句「保障你」，都有機會恣意踐踏和侵犯私有財產。歸根究底，會否只係「權」和「錢」從中作祟，原來是為了維護控制或稅收？我又覺因人而異，不應該妄下定論。
但可以大膽講句，世上但凡打著「安全啲、保障啲、安心啲、健康啲」口號的規管和限制，各式其式，多數絕非好東西，而且遠不止於金融領域。舉例禁售電子煙加熱煙的國家，美其名保障健康，實則是剝奪煙民選擇更低風險產品的自由。
我無意妖魔化所有規管機構，但即使架上「善良的眼鏡」，看出規管措施的原意，真心出於善意都好。但只要這些規管，無法帶出想要的效果，並構成無數人的不便甚至痛苦，它們就非但沒有「得分」，甚至可能是「負分」的。
打個比喻，就像一個精明能幹的女人，不斷拼命付出，自詡是個最模範的母親和妻子。但這種拼命的「付出」，往往很易變成「控制」、成為家人壓力的最大來源。傳統銀行和監管機構也是相同原理，既然我「都只係為咗你著想」，你何解還要走資到加密貨幣市場？行蹤又為什麼不能時刻向我匯報呢？
尹思哲