人基本上可以分兩種，機會降臨時敢想敢做把握機會的人，以及敢想不敢做留在舒適圈的人。由於安全符合人性，我們大部人其實都是後者，反而很多創業者和企業家都是前者。
今次要說的，算是一個典型香港仔創業的故事，主人翁 Jase 來自中產家庭，「履歷」包括：靚仔，名校，運動員，後生幫辦，早婚顧家，一張近乎完美的清單，就算沒有半途創業，在社會主流的角度也肯定是「人生勝利組」，又不是繼承上一代的成就，到底是個怎樣的機會，讓他如此輕易放棄？答案是「200蚊比特幣」。
「無人到估我會走」
最近這次「Crypto寒冬」，比特幣從高位回落到約 16800 美元，市場呼天搶地，但 Jase 留意到比特幣的當年，價位僅 200 幾美元，全香港大部份人未聽過，當時就算是識貨的「行內人」，頂多認為是一些什麼遊戲幣，並不認真看待，Jase 怎會想到辭去入境處幫辦的優差，從美國傾了比特幣ATM 機的代理權並在港創業？
「爸爸係的士司機，媽咪做社工，係入境處升到幫辦，明顯係大好前程，加上比特幣佢地未聽過，唔知道係咩，尤其係爸爸角度，覺得我好地地有幫辦唔做，當時好嬲，話要斷絕父子關係。」Jase並非軟件工程師，認識比特幣跟普通人無異，都是通過閱讀一些財經科技雜誌時，但大部分人不是無感，就是停留在心動層次，他竟然馬上行動，並於辭工僅 1 個月後，就在數碼港召開記者會，宣佈引入比特幣 ATM機。
相信自己判斷「少理阿爸」，原來 Jase早已不是第一次。創業後，他也有積極支持母校男拔萃的舊生會，但原來當初入讀這所傳統名校，也是他自己「力排眾議」爭取回來。「父母本來打算報另一間普通嘅中學，我當時知道男拔出名，係好學校，自己主動建議報讀，最後真係試吓去面試，結果收咗我。」
Jase大學雖然修讀經濟，在入境處任職時，但可能見他年輕肯學新嘢，一些跟IT有關的項目，上司喜歡派他負責。根據他的形容，自己不是不喜歡入境處的工作，而且以他年紀和際遇，某程度上稱得上「重點栽培」，所以他自己主動辭職，同事之間無人估得到。
Bitcoin 到 Blockchain
比特幣 ATM 的生意，受制於市況和監管因素，本身就有局限性，卻成了 Jase 進入另一個新興行業的鎖匙 — 區塊鏈企業應用方案。
「純粹係 demand driven，例如接企業和政府project。人地知你做咗 ATM，其實好多project 走埋嚟揾你，然後慢慢至知，原來有好多場景 blockchain 都有應用空間，亦係我地17 年開咗 Blockchain Solution 嘅原因。」
早兩年，公司幫衛生署做咗個 blockchain 流感針項目，開始知道醫療行業情況，邊做邊學如何以區塊鏈為傳統產增值。「政府最近出咗個 tender，先知原來要求有張 cert，我地至考返嗰張，但其實類似 project 早已經做咗好多個。」
不想一味「接Job」替人作嫁衣，Jase想到針對不同行業的痛點，找有行業經驗的合作伙伴一齊「孕育」產品，如果市場反應理想，就分拆成獨立公司， 繼而融資擴張。「其實寫個 smart contract 未必係最難嗰部分，係要有行業知識嘅人，清楚了解嗰行有咩pain point，最終至可以成功做到，於是會用一個 incubator 嘅形式去做，揾外邊 partner 合作。」
好多古靈精怪行家
區塊鏈科技有很多融入生活的「場景」，密碼貨碼僅是其中一種應用，兩者的關係是底層技術和應用層面， 卻偏偏有個類似的現像，就是「很多似懂非懂的投機主義者」。
「我地不時會參展，本地和外國都會去，試過見到某個參展booth，標榜佢自己係全世界第一個開發 blockchain 嘅人，咁我走埋去問佢，你係咪中本聰？點知佢問返我轉頭，邊個係中本聰。」
熊市出現之前，不論是區塊鏈抑或密碼貨幣，都是在一個近乎「野蠻生長」的產業，太多熱錢同時湧入，對於想認真做事的人，至少構成了兩個問題。
第一是由於「行家」太多，而且區塊鏈是新事物，較難去證明和區分「你公司係咪識」唔，個個都自稱是區塊鏈專家，結果能夠出示reference，參與過重要和有規模的項目，變相就已是「最好的marketing」。「其實大家都知，政府 project 係唔賺錢㗎，但點解要做呢？就係做過之後因為人地會更加信任你。」
另一佪是「人才」問題，Jase 以唔健康去形容。
「點解請唔到人，出現有好多煲，驚唔夠蓋嘅情形？本來，香港識 blockchain 技術人才就不多，求過於供就變了錢追人，偏偏市好時候，好多熱錢好多project，佢哋用高價搶人，明明請嘅人自己都未 ready，唔值咁高人工，但市場唔理智，總之搶咗先講。然後結果，人才跳嚟跳去，無錯錢係賺多咗，但做嗰樣嘢出嚟係咪好嘅 product？好多時 launch 咗一啲跟大隊趁墟嘅嘢，做嘅人其實白白浪費咗自己時間同學習機會。」
他認為跌市之所以係「好事」，在於回歸現實，像他們這類接開政府project的公司，現在反而更「興香」，更多人尋求合作，皆因大家都不想自己開team承擔風險。
香港電影 Web3 體驗
公司旗下有五六個產品，期望最後可以獨立分拆成公司，其中一個新嘗試，是跟電影公司mm2合作的 Elite Film Club (EFC)，將 NFT 應用在電影收藏品層面，同時亦希望實驗Web3 社群概念支持電影人，亦即所謂tokenomics 來鼓勵和直接支持好電影，跟傳統眾籌平台 Kickstarter 的操作原理類似。
從 NFT 收藏和融資角度「切入」電影工業，在這個香港電影忽然活躍的時間點，似乎來得合時。
若有合適的項目和內容注入，例如一些獨有的內容，例如演員和導演的親筆簽名，經典電影場景或對白，擁有者可跟電影團隊線下交流的機會等，照計不難說服消費者，而且也是善用 NFT 和區塊鏈智能合約的「場景」，聽落不是虛火。據了解，EFC 頭炮是由張繼聰，袁澧林主演的《窄路微塵》，他們嘗試了讓 EFC 會員有獨家彩蛋，未曝光片段，首映門票和關鍵電影場景沉浸式體驗。
問題是幣市「從牛入熊」，就算 EFC 本身可以不涉及密碼貨幣，僅應用 NFT 區分會員身份，但會否擔心不景氣情緒令人卻步？
「咁世界初有互聯網嗰陣， Bill Gates 接受訪問，啲主持人都 challenge 佢，都已經有電台仲點解需要互聯網直播球賽？其實同一套講法，套返落今天去睇 Web3 Blockchain 或者Metaverse 發展其實都係一樣適用。」
如果沒有記錯，上一次大跌市是 2017 年，當時情況跟今天類似（記得 ICO 嗎？），同樣地有很多項目忽然收入歸零，當時 Jase 賣了自己層樓，以維持公司正常運作，又順勢做埋區塊鏈應用方案，今天不止「無穿無爛」之餘，公司發展潛力已不可同日而語。隨住區塊鏈由無人問津，到今日變成新興和「戰略級數」產業， Jase 生意愈做愈大，大客戶名字爸爸亦都識得，早已接受了他。
我從他的故事似乎隱約看到，這是一個當機會降臨，快速把握，邊做邊學，自證實力，繼而又再迎接下個重要機會的循環。大部份人只睇到「200幾鎂比特幣」，反而是這個故事最不重要的部分。
編採：尹思哲